Тұрғын үй кезегінде тұрсыз, бірақ өзіңізді қайдан іздеу керегін білмейсіз бе? Әлде статусты көптен бері тексермедіңіз бе? Мұның бәрін онлайн жасай аласыз.

Қайда басып, нені қарау керегін түсіндіреміз.

Нұсқаулық: тұрғын үй кезегін қалай тексеруге болады

  • Отбасы банкінің сайтына кіріңіз. Компьютер немесе ноутбук арқылы ашқан дұрыс, телефонда кейбір дерек ашылмауы мүмкін.
  • «Қолжетімді баспана» → «Тұрғын үйге мұқтаж ретінде есепте тұрған азаматтардың тізімі» бөліміне өтіңіз.

  • Excel форматындағы актуал тізімді жүктеп алыңыз.
  • Ctrl + F пернелерін басып, тегіңізді жазыңыз. Өзіңізді жалпы тізімнен табасыз.


     
  • Кезектегі орныңызды көру үшін «Ішінара санат» бағаны бойынша астыдағы бөлімді ашып, өз санатыңызды таңдаңыз: көпбалалы отбасы, мемлекеттік қызметкер, жетім балалар, толық емес отбасы және т.б.

Сіздің санатыңыз бойынша тізім ашылады. Алдыңызда қанша адам тұрғанын көре аласыз. Кезек нөмірі көк түспен жазылады.

Статусыңызды тексеруді ұмытпаңыз

Бұл маңызды. Кезек белсенді болмауы мүмкін. Статусыңыздың жанында «тоқтатылған» деп тұрса, кезек уақытша тоқтағанын білдіреді. Әдетте мұндай жағдай адам түгендеуден өтпегенде болады.

Түгендеуден қалай өтуге болады

  1. Orken платформасына ЭЦҚ арқылы кіріңіз.
  2. Жеке кабинетіңізді ашыңыз.
  3. «Түгендеу» бөліміне өтіңіз.
  4. «Түгендеуді бастау» батырмасын басыңыз.

Отбасының әр мүшесі жүйеге кіріп, келісімге қол қоюы керек.

Кезекті ЖСН арқылы тексеруге бола ма

Иә, бірақ ақпарат аз болады. Жүйе тек кезектегі адамның статусын көрсетеді.

Қалай тексеруге болады:

  1. Orken Otbasybank сайтына кіріңіз.
  2. «Өз мәртебеңізді біліңіз» батырмасын басыңыз.
  3. ЖСН жазыңыз.

Қазіргі статусыңыз шығады.

Тұрғын үй кезегі не береді

Мемлекеттен қолдау алуға мүмкіндік береді. Қазір үш негізгі бағыт жұмыс істейді:

  1. Пәтер жалдауға субсидия.
  2. Мемлекет жалға беретін тұрғын үй.
  3. Жеңілдікті ипотека: 2 және 5 %, 7–9 %-дық «Наурыз» бағдарламасы.

Көмек түрі табыс деңгейіне және кезектегі адамның санатына байланысты.

Кім кезекке тұра алады

Қазақстанның кәмелетке толған кез келген азаматы немесе қандас өтінім бере алады, бірақ мына талаптарға сай болуы керек:

  • жасы 18-ден жоғары;
  • өтініш берушінің, отбасы мүшелерінің соңғы 5 жылда тұрғын үйі болмауы қажет;
  • тұрақты тіркелген.
    Астана, Алматы және Шымкент қалалары үшін кемінде 3 жыл тіркелген болуы қажет. Басқа өңірлерде тіркеу мерзімі маңызды емес.

Тұрғын үй кезегіне қалай тұруға болады

  1. Orken Otbasybank сайтына ЭЦҚ арқылы кіріңіз.
  2. Өтінім жіберіңіз.
  3. 1414 нөмірінен келген SMS-код арқылы растаңыз.

Өтінімді компьютер немесе ноутбук арқылы берген дұрыс.

Қызық болуы мүмкін:
Биыл мемлекет беретін пәтерді қалай алуға болады
Қазақстандағы тұрғын үй кезегі: сұрақтарға жауап
Қазақстандағы мөлшерлемесі төмен топ-3 ипотека
2 және 5%-дық ипотекаға берілетін пәтерді қайдан алуға болады
Қазақстан билігі несиеге лимит қояды