Алматы мен Астана Қазақстандағы ең қымбат жалға берілетін баспанасы бар қалалардың қатарында. Алайда жеке пәтер қалтаға салмақ түсірсе, арзан нұсқалар бар — хостелдегі орын, бөлмені біреумен бірге жалға алу немесе бірнеше адам болып пәтер жалға алу.
Біз krisha.kz-тегі хабарландыруларды қарап, Алматы мен Астанада баспанаға ең аз дегенде қанша қаражат кететінін анықтадық.

Хостел — айына 35 000–45 000 теңге

Ең арзан нұсқа — хостелдегі орын. Алматы мен Астанада баға тәулігіне 1500 теңгеден басталады.
Бір ай тұрсаңыз 45 000 теңге болады. Кейбір хостелде бірден бір айға төлегенде баға одан да төмен болуы мүмкін. Мысалы, Алматыда айына 35 000 теңгеден басталатын нұсқалар кездеседі.

Ыңғайлырақ орынның бағасы тәулігіне 2000–3000 теңге, яғни айына шамамен 60 000–90 000 теңге. Тәулігіне 5000 теңгеге жететіндері де бар.

Әдетте бір бөлмеде алтыдан он адамға дейін болады. Төсек көбіне екі қабатты, кейде капсула түрінде болады. Ерлер мен әйелдерге арналған бөлек бөлмелер бар.
Баға төсектің орнына байланысты болуы мүмкін, төменгі орын әдетте үстіңгіден қымбат.

Бұл бағаға тегін Wi-Fi, асүй, душ пен дәретхана, кір жуғыш машина, жеке заттарға арналған шкаф, теледидары бар ортақ демалыс бөлмесі және автотұрақ кіреді.

Біреумен бірге бөлме жалға алу — Алматыда 60 000 теңгеден, Астанада 30 000 теңгеден басталады

Тағы бір арзан жолы — пәтерді толық алмай, жеке бөлме жалға алу.
Бұл жағдайда жатын бөлме өзіңіздікі, ал асүй мен жуынатын бөлме ортақ болады. Мысалы, пәтер иесі екі бөлмелі пәтерде өзі тұрып, екінші бөлмені жалға беруі мүмкін.

Алматыда мұндай пәтердің бағасы айына шамамен 60 000 теңгеден, Астанада 30 000 теңгеден басталады.

Негізгі артықшылығы — жеке пәтер жалға алуға қарағанда әлдеқайда арзан. Кемшілігі — ортақ бөлмелерді басқа тұрғындармен бірге пайдалануға тура келеді.

Мұндай жағдайда пәтерде тағы кім тұратынын, бағаға не кіретінін және коммуналдық қызметтер үшін бөлек ақы төлене ме, жоқ па, алдын ала нақтылап алған маңызды.

Жер үй — бір адамға 50 000 теңгеден басталады

Хабарландыруларда кездесетін тағы бір арзан нұсқа — жер үйден орын жалға алу.
Көбіне мұндай үйдің иесі бірден бірнеше адамға, мысалы, студенттерге немесе тек ер адамдарға не тек әйелдерге жалға береді. Үйде бірнеше бөлме, ал әр бөлмеде бірнеше жатын орын болуы мүмкін.
Алматыда адам басына айына шамамен 50 000 теңгеден басталатын үйлер кездеседі. Бұған коммуналдық шығындар қосылады.
Бұл хостел мен жеке пәтердің арасында деуге болады: тұрғындар саны үлкен хостелдегіден аз, бірақ асүй мен жуынатын бөлме ортақ болады.

Бірге пәтер жалға алу

Хостелде тұруды немесе біреумен бір бөлмеде тұруды қаламасаңыз, достарыңызбен бірігіп, пәтер жалға алуға болады.
Мысалы, 300 000 теңгелік пәтерді екі адам жалға алса, әрқайсысына 150 000 теңгеден түседі, ал үш адам алса — адам басына 100 000 теңгеден болады.

Бірге жалға алғанда келісімшартта барлық тұрғынның аты-жөнін бірден жазу қажет, сондай-ақ жалға алу ақысы мен коммуналдық төлемдердің қалай бөлінетінін нақты жазу маңызды.

Толығырақ: Пәтерді бөліп жалға алуға бола ма

Қоныстанбас бұрын нені тексеру керек

Қандай арзан жолды таңдасаңыз да, баспананы көріп, құжаттарды тексермей тұрып ақша аудармаған жөн.
Бөлме немесе пәтер жалға алсаңыз, жалға алу келісімшартын жасаңыз. Онда жалға алу құны, мерзімі, тұрғындар саны, коммуналдық қызметтерді төлеу тәртібі және басқа да шарттар жазылуы керек.

Врезка: Дайын жалға алу келісімшартының үлгісін Krisha.kz-те тегін жүктеп алуға болады. Оны заңгерлермен бірге әзірледік және жалға алушы үшін негізгі қауіптерді ескереді.

Ал бұрыннан жалға алынған пәтерге басқа адамды қосу керек болса, алдымен келісімшартты тексеру қажет: онда басқа адамды қосуға немесе қосалқы жалға беруге тыйым салынуы мүмкін.

Қызық болуы мүмкін:
Пәтерді жалға бергенде депозит алу заңды ма

Krisha.kz материалын пайдаланғанда бірінші абзацта міндетті түрде сілтеме болуы керек!