Үкімет Астананың 2035 жылға дейінгі Бас жоспарын жаңартты.
Тоғыз жылда 33.3 млн шаршы метр тұрғын үй салынады. Ескі құрылыстардың бір бөлігі бұзылады. Осы және басқа жоспарларды жүзеге асыруға 3.6 трлн теңге жұмсалады.
Жаңа Бас жоспардағы негізгі өзгерістерді ұсынамыз.

Астанада 33 млн шаршы метр тұрғын үй салынады

Қазір елордадағы тұрғын үй қоры 36.7 млн шаршы метрге жуықтайды. Билік 2035 жылға қарай оны екі есе арттырып, 68.3 млн шаршы метрге жеткізуді жоспарлап отыр.

Жаңа тұрғын үйдің басым бөлігі көпқабатты үйлерден тұрады. Оның бір бөлігі бос аумақтарда бой көтерсе, тағы бір бөлігі қолданыстағы құрылыстардың орнына салынады.

Қандай құрылыстар бұзылады

2035 жылға дейін қолданыстағы 1.7 млн шаршы метр тұрғын үй бұзылады. Оған тозығы жеткен және апатты жағдайдағы үйлер, саяжайлар, гараждар мен аз қабатты үйлер кіреді.

Бас жоспарда нақты үйлердің тізімі жоқ. Қай жерде қандай объектілер бұзылып, олардың орнына не салынатыны жоспарлау және құрылыс жобасында белгілі болады.

Астана аудандары секторларға бөлінеді

Қазір қалада алты аудан бар. Жаңа Бас жоспарға сәйкес олардың аумағы 148 жоспарлау секторына бөлінеді.

Секторлар былай бөлінеді:

  • «Алматы» — 24 сектор;
  • «Байқоңыр» — 19;
  • «Есіл» — 27;
  • «Нұра» — 28;
  • «Сарайшық» — 27;
  • «Сарыарқа» — 23.

Бұл шағынаудандарға ұқсас ірі тұрғын аумақтар. Әр секторда тұрғын үйлерге жақын жерде мектептер, балабақшалар, дүкендер, спорт нысандары, саябақтар және қоғамдық орындар болады.

Халық саны өскен сайын жаңа әлеуметтік инфрақұрылым қажет. 2035 жылға дейін 206 балабақша мен 178 мектеп салынбақшы.

Халық саны 2.3 млн адамға жетеді

Қазір Астанада 1.5 миллионға жуық адам тұрады. 2030 жылға қарай халық саны 2 млн адамға жуықтап, ал 2035 жылға таман 2.275 млн адамға жетуге тиіс.

Тұрғын үймен қамтамасыз ету деңгейі артады. Қазіргі бір адамға 24 шаршы метрден 2035 жылға қарай 30 шаршы метрге жетеді.

Екі кезең: 2030 жылға дейін және 2035 жылға дейін

Бас жоспар екі кезеңнен тұрады.

2030 жылға дейінгі жоспар:

  • халық саны — 2 млн-ға жуық адам;
  • жаңа тұрғын үй — 15.3 млн шаршы метр;
  • бұзылатын нысандар — 484 мың шаршы метр;
  • тұрғын үймен қамтамасыз ету — 26.2 шаршы метр/бір адам.

2035 жылға қарай:

  • халық саны — 2.275 млн адам;
  • жаңа тұрғын үй — жалпы 33.3 млн шаршы метр;
  • бұзылатын нысандар — 1.7 млн шаршы метр
  • тұрғын үймен қамтамасыз ету — 30 шаршы метр/бір адам.

Бас жоспар қаланың жалпы даму бағытын көрсетеді, бірақ нақты үйлердің қашан бұзылатынын немесе қашан салынатынын белгілемейді. Бұл жеке жоспарлау және құрылыс жобаларында белгілі болады.

Астананың жаңа Бас жоспары туралы Үкімет қаулысы 8 тамыздан бастап күшіне енді.

Пайдалы материалдар:
Астанада аудан шекарасы өзгереді: мекенжайға не болады
Ипотека немесе жалға алу: 2026 жылы қайсысы тиімді