Алматыда ауладағы шлагбаум мен басқа қоршауларға қатысты жаңа ереже пайда болды. Енді аулаға мұндай құрылымды өз бетінше орнатуға болмайды, тәртіп жер телімі кімге тиесілі екеніне байланысты. Жаңа талаптар Алматы мәслихатының 2026 жылғы 30 шілдедегі № 324 шешімімен бекітілді.

Шлагбаум ортақ жерде тұрса, аудан әкімінің аппаратымен келісу қажет.

Жер үйдің ортақ мүлкіне жатса

Шлагбаум кондоминиум аумағына орнатылатын болса, пәтер иелерінің жиналысын өткізу қажет.

Орнату үшін:

  • үйдегі барлық үй-жай иелерінің үштен екісінен астамының келісімі;
  • жиналыс хаттамасы қажет.

Ортақ пайдаланылатын жер болса

Мұндай жерге шлагбаум орнату үшін аудан әкімдігімен келісу қажет.

Жер жеке меншік немесе оны пайдалану заңды болса, әкімдіктен рұқсат алудың қажеті жоқ. Жердің меншік иесі немесе пайдаланушысы шлагбаум орнатылатыны туралы аудан әкімінің аппаратын хабардар етсе жеткілікті.

Шлагбаумдарға қойылатын талаптар

Шлагбаумға қызмет көрсететін ұйымның атауын және байланыс дерегін жазу керек.

Шлагбаум қашықтан да, қолмен де ашылуы қажет.

Арнайы көліктер (жедел жәрдем, өрт сөндіру және апаттық қызмет) тәулік бойы еркін өте алуға тиіс.

Шлагбаумның орнына бетон блоктар, қоршаулар немесе басқа кедергіні орнатуға болмайды.