Отбасы банк «Наурыз» ипотекалық бағдарламасы бойынша іріктеу нәтижесін жариялады. Негізгі тізімге 16 000 салымшы кірді.

Іріктеу қалай өтті

Банк қатысушыларды ұпай бойынша таңдады. Ұпай неғұрлым жоғары болса, бағдарламаға қатысу мүмкіндігі соғұрлым жоғары.
Іріктеуден өткендердің ішінде:

  • ең төмен ұпай — 78;
  • ең жоғары — 1284.

Бұл тізімге 78 және одан көп ұпай жинағандар кірді.

Ұпай бойынша нақты шек жоқ, бәрі қатысушылар саны мен олардың жинағына байланысты. Ұпай депозиттің мерзімі мен ондағы жинаққа, ресми некеге, балалардың бар-жоғына және т.б. байланысты беріледі.

Іріктеуден өткен-өтпегеніңізді қалай тексере аласыз

Нәтиже otbasybank.kz сайтында бар.

  1. Отбасы банк сайтына кіріңіз.
  2. «Менің өтінімдерім» бөліміне өтіңіз
  3. «Наурыз» бөлімшесін таңдаңыз
  4. Өтініміңізді ашқанда нәтижені көресіз

Банк сайтында жалпы тізім де бар.

Бұл жолы өтпегендерге «Наурыз» бағдарламасы тағы 5 жыл жұмыс істейтінін еске саламыз. Сондықтан дайындалып, қайта қатысуға болады.

«Наурыз» ипотекасы: қалай өтінім беруге болады

Іріктеуден өттіңіз: келесі қадамдар қандай

Негізгі тізімге енгендер үшін келесі кезең — қатысушылардың төлем қабілетін бағалау.
Одан 6 сәуір мен 12 мамыр аралығында өту қажет.

Қатысушы несиені өтеуге табысы жеткілікті екенін растауға тиіс. Банк зейнетақы жинағы, еңбек табысы, кредит тарихы және қолданыстағы несиені тексереді:

Төлем қабілетін растағаннан кейін, тұрғын үй іздеуге және несие рәсімдеуге 6 ай беріледі.

Пәтерді қайдан іздеу керек

Тұрғын үйді Baspana Market платформасынан таңдау керек.

Маңызды:
Бір несие аясында пәтер сатып алуға ғана емес, жөндеуге де қаражат алуға болады
Пәтер толық әрленген болса бастапқы жарна 10% болады, қара сылақпен әрленсе — 20%

Астана, Алматы, Шымкент және облыс орталықтарында тек бірінші нарықтағы тұрғын үйді таңдауға болады (соның ішінде КЖК кепілдігі бар салынып жатқан тұрғын ұйлер)
Өңірлер мен моноқалаларда — бірінші және екінші нарықтағы тұрғын үй, сондай-ақ жер үй алуға болады.

«Наурыз» ипотекасының шарттары

  • Мөлшерлеме:

— әлеуметтік осал топтар үшін — 7%;
— қалған қатысушылар үшін — 9%.

  • Ең жоғары сома:

— Алматы мен Астанада — 36 млн теңгеге дейін
— Басқа өңірлерде — 30 млн теңгеге дейін

  • Кредит мерзімі:

19 жыл.