Кеше Отбасы банк «Наурыз» ипотекасы бойынша іріктеу қорытындысын жариялады.
Негізгі тізімге 26 822 өтінімнің ішінен 16 000 қатысушы кірді.
Келесі кезең — қатысушының төлем қабілеттігін бағалау.

Одан 6 сәуір мен 12 мамыр аралығында өту қажет, яғни қатысушыларға бір ай уақыт беріледі.

Дәл осы кезеңде банк сіз ипотека төлей аласыза ба, жоқ па, анықтайды.
Жиі қойылатын сұрақтарға жауап дайындадық.

Қандай табыс есепке алынады?

Отбасы банк тек ресми табыс есепке алынады деп түсіндірді.

Яғни табыс соңғы 6 айдың зейнетақы аударымымен расталады.

Жалақының бір бөлігін қолма-қол ақшамен алып, одан зейнетақыға аударым жасамасаңыз, мұндай табыс есепке алынбайды.

Банк ипотеканы мақұлдау үшін қанша табыс табу керек?

Нақты шекті мөлшер жоқ.

Маңыздысы — табыс ипотеканы төлеуге және қалыпты өмір сүруге жеткілікті болуы керек.

Банк мыналарды ескереді:

  • отбасының табысы,
  • жұмыс істейтіндердің саны,
  • балалар мен асырауындағы адамдар саны,
  • қазіргі несиелер.

Жәрдемақы табыс ретінде есептеле ме?

Жоқ. Әлеуметтік төлем мен жәрдемақы табыс ретінде есептелмейді.

Басқа несиелер бағалауға әсер ете ме?

Иә, тікелей әсер етеді.
Банк мыналарды ескереді:

  • қазіргі несиелер,
  • кредит тарихы,
  • отбасының жалпы қаржылық жүктемесі.

Мысалы, несие жұбайыңыздың атында болса, бұл несие алу мүмкіндігін төмендетуі мүмкін.

Ерлі-зайыптылардың табысын немесе несиесін есепке алмауға бола ма?

Жоқ. Бүкіл отбасының, яғни екі жұбайдың да табысы мен несиесі есепке алынады.

Төлем қабілетін бағалау үшін қандай құжаттар керек?

Қосымша құжат жинаудың қажеті жоқ. Бағалау кезінде тексеріс мемлекеттік деректер базасында өтеді.

Тексерістен қалай өтуге болады?

Екі жолы бар:

1. Банк бөлімшесінде — алдын ала банк қосымшасы немесе сайт арқылы қажет уақытқа жазылған дұрыс.
2. Онлайн — менеджермен бейнеқоңырау арқылы. Ол үшін бейнеқоңырауға өтінім жіберу қажет.

Маңызды
Әр жағдай жеке қарастырылады. Сондықтан Отбасы банктің менеджеріне (бөлімшеде немесе онлайн) жүгінген дұрыс.

«Наурыз» ипотекасы бойынша төлем қандай?

Алғашында төлем жоғары болады, кейін азаяды.
Бірінші кезеңде алдын ала несие рәсімделеді, кейін қатысушы тұрғын үй несиесіне ауысады.

7% мөлшерлемемен ипотека төлемін есептеу

Несие сомасы

15 млн

20 млн

30 млн

Баст. жарна

3 млн

4 млн

6 млн

Мөлшерлеме (алдын ала несие)

7%

7%

7%

Алдын ала несие (8 жыл)

126 500 тг

168 700 тг

253 000 тг

Тұрғын үй несиесі (11 жыл)

58 500 тг

81 700 тг

128 000 тг

19 жылда артық төлем

7.8 млн

11 млн

17 млн

9% мөлшерлемемен ипотека төлемін есептеу

Несие сомасы

15 млн

20 млн

30 млн

Баст. жарна

3 млн

4 млн

6 млн

Мөлш. (алдын ала несие)

9%

9%

9%

Алдын ала несие (8 жыл)

151 500 тг

202 000 тг

303 000 тг

Тұрғын үй несиесі (11 жыл)

58 500 тг

81 700 тг

128 000 тг

19 жылда артық төлем

10.3 млн

14 млн

22 млн

Қызық болуы мүмкін:
Қазақстандағы ипотека: табыс қанша болуы керек
Жаңа тұрғын үйге арналған ипотека — 2026: барлық банктің шарттары