Қазақстанда маман тапшылығы бар өңірлерге ерікті түрде қоныс аудару бағдарламасының шарттары өзгерді. Енді қатысушылар тұрғын үй сатып алуға 7 млн теңгеге дейін қаржы ала алады. Өзгеріс биыл 14 тамызда күшіне енеді.

Баспана сатып алуға 7 млн теңге

Ерікті қоныс аудару бағдарламасы 2017 жылдан бері жұмыс істейді. Оның мақсаты — жұмысшы тапшы өңірлерге білікті мамандарды жіберу. Мемлекет қатысушыларды жұмыспен қамтуға көмектеседі, көшуге кеткен шығынды, тұрғын үй жалдау ақысын және коммуналдық қызметті өтейді, сондай-ақ баспана сатып алуға қаржы береді.

Не өзгерді: Енді қоныс аударушылар 1625 АЕК-ке (2026 жылы 7 028 125 теңге) дейін тұрғын үй сертификатын ала алады. Бұған дейін билік 1160 АЕК берген.

Бұл қаражатты азамат көшіп барған елді мекеннен тұрғын үй сатып алуға жұмсайды.

Маңызды: Үй немесе пәтердің құны сертификат сомасынан арзан болса, мемлекет тұрғын үйдің нақты құнын ғана төлейді.

Кім қатыса алады

Жаңарған ережеде қатысушылар қатары кеңейді. Енді бағдарламаға сұранысқа ие мамандар (әр өңірде қажет мамандықтардың тізімі әртүрлі), шаруа және фермер қожалықтарының басшылары қатыса алады.

Өтінімді migration.enbek.kz порталы арқылы онлайн беруге болады.
Порталда мынадай ақпарат бар:

  • қоныс аудару өңірлерінің картасы;
  • сұранысқа ие мамандықтар тізімі;
  • жұмыс берушілер ұсынған бос жұмыс орындары.

Өтінім 14 жұмыс күні ішінде қаралады.

Мына өңірлерге қоныс аударуға болады:

  • Ақмола облысы,
  • Қарағанды облысы,
  • Қостанай облысы,
  • Павлодар облысы,
  • Солтүстік Қазақстан облысы,
  • Шығыс Қазақстан облысы,
  • Абай және Ұлытау облыстары.

Тағы қандай төлем бар

Тұрғын үй сертификатынан бөлек, мемлекет мынадай қолдау көрсетеді:

  • отбасының әрбір мүшесіне көшуге 70 АЕК мөлшерінде біржолғы төлем;
  • тұрғын үй жалдау ақысы мен коммуналдық қызметке 12 айға дейін ай сайынғы өтемақы;
  • жұмысқа орналасуға көмек;
  • кәсіби оқыту (қажет болған жағдайда);
  • қызметтік тұрғын үй немесе жатақханадан бөлме (жекелеген жағдайларда).

Жалға алу ақысына берілетін өтемақы отбасы құрамына және тұратын жеріне байланысты.
Қалада ай сайынғы өтемақы — 20–30 АЕК, ал ауылды жерлерде — 15–21 АЕК.