Отбасы банк тұрғын үй несиелерінің мөлшерлемесін көтереді. Жаңа шарт 2026 жылғы 4 маусымнан бастап күшіне енеді.

Отбасы банктегі ипотека қымбаттайды

4 маусымнан бастап Отбасы банк аралық тұрғын үй несиесінің шартын өзгертеді.

Бірнеше мөлшерлеменің орнына бірыңғай — 8.5% болады. Жылдық тиімді сыйақы мөлшерлемесі (ЖТСМ) 9-9.6%-ға жетеді.

Өзгеріс банктің ең танымал ипотекалық өнімдерінің басым бөлігіне әсер етеді. Олардың қатарында бірінші және екінші нарықтан тұрғын үй сатып алу, үй салу, жөндеуге арналған, сонымен қатар «Әскери баспана» және «Өз үйім» бағдарламалары бар.

Аралық несие деген не?

Аралық несие — Отбасы банктегі депозитінде тұрғын үй құнының кемінде 50%-ын жинаған, бірақ тұрғын үй қарызын алу үшін қажет бағалау көрсеткішіне (16) жетпеген клиенттерге арналған ипотека.

Аралық несиені рәсімдеу үшін:

  • тұрғын үй құнының кемінде 50%-ын жинау керек;
  • бағалау көрсеткіші 5-тен төмен болмау қажет;
  • қажет соманы салғаннан кейін кемінде 6 ай күту керек.

Осыдан кейін банк қалған сомаға аралық несие береді.

Бұрын қалай еді, енді қалай болады

Бұрын аралық несиенің мөлшерлемесі бағдарламаға және клиенттің бағалау көрсеткішіне байланысты еді.

  • Бұрын: 6-8.5%. Әр бағдарламаға жеке шарт.
  • Қазір: 8.5%. Барлық бағдарламаға бірыңғай мөлшерлеме.

Бұған дейін 6–7.5% мөлшерлемемен несие алуға үміткер болған клиенттер үшін ипотека қымбаттайды.

Өзгеріс кімге әсер етеді

Бірыңғай 8.5% мөлшерлеме мынадай бағыттар бойынша қолданылады:

  • бірінші нарықтан тұрғын үй сатып алу;
  • екінші нарықтан тұрғын үй сатып алу;
  • үй салу;
  • жер телімін сатып алу;
  • тұрғын үй жөндеу және жаңарту;
  • «Өз үйім» бағдарламасы;
  • кейін сатып алу мүмкіндігімен жалға берілетін тұрғын үй;
  • «Әскери баспана» бағдарламасы.

Тұрғын үй мен алдын ала несие бойынша мөлшерлеме өзгермейді.

Ай сайынғы төлем қаншалықты өседі

Отбасы банк есебінше 30 млн теңге несие бойынша 7.5 және 8.5% мөлшерлеме арасындағы айырмашылық несие мерзіміне қарай 12–20 мың теңгені құрайды.
15–20 жылға ипотека рәсімдеген отбасы жылына 144-240 мың теңге артық төлейді деген сөз.

Ескі шартпен ипотеканы кім рәсімдей алады

Банк клиенттің 2026 жылғы 4 маусымға дейін рәсімдеген несиесін алдын ала мақұлдаса, ипотеканы бұрынғы шарттармен береді.
Яғни ипотеканы рәсімдеудің соңғы кезеңінде тұрған азаматтарға алаңдаудың қажеті жоқ.

Банк неге мөлшерлемені өзгертіп жатыр

Отбасы банк бұнымен несие шарттарын жеңілдетпекші.
Бұған дейін клиенттер бірнеше мөлшерлеменің арасынан өзіне қатысты шартты анықтап, есептейтін.

Енді барлық аралық тұрғын үй несиесі үшін бірыңғай мөлшерлеме 8.5% болады.

Krisha.kz материалынан дәйексөз келтіру үшін редакциядан рұқсат алу қажет. Krisha.kz материалын пайдаланғанда бірінші абзацта міндетті түрде сілтеме болуы керек!