Қазақстанда пайызсыз ислам ипотекасы пайда болуы мүмкін. Жаңа өнімді «Отбасы банк» 2026 жылдың күзінде іске қосуды жоспарлап отыр. Бұл туралы банк басқармасының төрайымы Ләззат Ибрагимова «Қазинформға» берген сұхбатында мәлімдеді.

Оның айтуынша өткен аптада Қаржы нарығын реттеу және дамыту агенттігі Отбасы банкке исламдық қаржыландыру қағидаттары бойынша жұмыс істеуге мүмкіндік беретін заң жобасын бірінші оқылымда таныстырған.
Қазір банк өзгерістің қабылданғанын және лицензияны күтіп отыр.

— Билік маусымның аяғына дейін заңға қол қояды деп ойлаймын. Тамызда лицензияны рәсімдейміз. Қыркүйекте немесе 1 қазанда ислам қағидаттарына негізделген жаңа өнімді жариялаймыз, — деді Ибрагимова.

Ислам ипотекасы қалай жұмыс істейді

Ислам ипотекасының негізгі қағидаттары:

  • Тұрғын үйді банк сатып алады.
  • Кейін оны пайызсыз, бірақ алдын ала белгіленген үстемемен бөліп төлеу мүмкіндігімен сатады.

«Отбасы банк» басшысы исламдық қаржыландыруда пайыз қосуға тыйым салынатынын атап өтті.

— Бұл шын мәнінде пайызсыз депозит пен несие болады. Қандай да бір басқа коэффициент арқылы емес, нақты пайызсыз жүйе болады, — деп түсіндірді ол.

Сонымен қатар тұрғын үй құрылыс жинақ жүйесі қалады.

Әзірге Отбасы банктегі ислам ипотекасының нақты шарттары белгісіз.

Бұған дейін Қазақстанда ислам ипотекасын Al Hilal Bank ұсынған. Бірақ 2022 жылдың көктемінен бастап ол банк ипотекалық несие беруді тоқтатты.