Қазақстан билігі тұрғын үйді жер сілкінісінен, су тасқынынан және орман өртенуінен міндетті түрде сақтандыруды жоспарлап отыр. Осы мақсатта арнайы қор құрылады.
Бұл туралы 2030 жылға дейінгі сақтандыру нарығын дамыту бағдарламасын талқылау барысында белгілі болды.

Сақтандыру қанша тұрады

Нақты тариф әзірге белгісіз. Алайда бір жыл бұрын шарттар талқыға түсті:

  • жыл сайынғы жарна — өңірге және қауіп деңгейіне байланысты 1000-20 000 теңге аралығында;
  • төлем мөлшері — жарнаның 500 есесіне дейін. Мысалы, 1000 теңге жарна төлеген жағдайда — 500 000 теңге, ал 20 000 теңге төлегенде — 10 млн теңгеге дейін.

Зейнеткерлерге, жағдайы төмен отбасылар және басқа әлеуметтік осал топтарға жарнаны мемлекет есебінен толық немесе ішінара төлеу мүмкіндігі қарастырылған.

Сақтандырумен кім айналысады

Осы мақсатта Тұрғын үйді міндетті сақтандыру қоры құрылады. Ол жарналарды жинап, резерв жасайды және өтемақы төлейді.

Қандай қауіптер қамтылады

Былтыр талқыланған нұсқада үкімет табиғи апаттардың төрт түрін қарастырды:

  • жер сілкінісі,
  • сел,
  • су тасқыны,
  • табиғи орман өрті.

Қауіп деңгейі жоғары өңірлерге ерекше көңіл бөлінбекші. Бірінші кезекте елдің оңтүстік және оңтүстік-шығыс аймақтары қамтылады.

Қашан іске қосылады

Алдымен жаңа сақтандыру туралы заңда ереже бекітілуі керек. Заң жобасы жыл аяғына дейін Құрылтайдың қарауына жіберіледі.

Пайдалы материалдар:
Нотариуссыз мәміле рәсімдеп, 50 мың теңге үнемдеудің жолы
Пәтер сатып алар алдында нені тексеру керек: құжаттар мен маңызды жайттар
Қазақстанда пәтер жалға алу бағасымен не болып жатыр
Алматыда 155 мың газ есептегіш тегін ауысады
Мердігер кіреберісті нашар тазаласа, оны қалай ауыстыруға болады