Алматы билігі үй кезегінде тұрған кісілерге жалға берілетін пәтерді алғанын растауға бес жұмыс күнін берді. Одан кешіккен жағдайда, баспананы кезектегі келесі адам алады.

Кезектегі кісілер не істеуі керек

Алматыда 20 шілдеде жалға берілетін пәтер таратудың жаңа кезеңі басталды. Отбасы банк 1414 нөмірінен SMS жіберіп жатыр.
Бұл жолы 300 пәтер иесін табады. Олар алдыңғы кезеңнен қалған. Сол кезде жауапты мекеме 816 пәтер ұсынған.

Мемлекеттен пәтер жалға алу үшін кезекте тұрсаңыз, SMS бар-жоғын және orken.otbasybank.kz порталындағы жеке кабинетіңізді тексеріңіз.

Пәтер тарату туралы хабарлама алсаңыз:

  • инвентаризациядан өтіңіз;
  • келісім беріңіз не пәтерден бас тартыңыз.

Бұған SMS алған сәттен бастап небәрі 5 жұмыс күні беріледі. Осы уақыт аралығында инвентаризациядан өтіп, келісім беріп үлгермесеңіз, пәтер сізден кейін тұрған адамға өтіп кетеді.

Хабарлама келмесе ше

Кезекте тұрған кей тұрғын хабарлама алмауы мүмкін. Мысалы, телефон нөмірі өзгерсе не SMS спамдар тізіміне түсіп кетсе не басқа техникалық мәселе болса.

Сондықтан баспанасын күтіп отырған азамат тізімде бар-жоғын өз бетінше тексергені жөн.

Тізім orken.otbasybank.kz ресми Telegram-каналында жарияланған.

  • Telegram-каналға кіріңіз.
  • Облыс не қала бойынша тізімді табыңыз.
  • Жарияланған тізімді жүктеп алыңыз.

Тізімнен есіміңізді тапсаңыз:

  • orken.otbasybank.kz порталына кіріңіз.
  • Инвентаризациядан өтіңіз.
  • Пәтер алуға келісім беретініңізді растаңыз.

Авторлану үшін ЭЦҚ қажет болады.