Пәтер сатып алып, жалға бергеннен пайда бар ма? Krisha.kz жылжымайтын мүлік алуға кеткен ақшаны қанша жылда қайтарып алуға болатынын және бұл процесс қай қалаларда жылдам жүзеге асатынын анықтады.

Жалға берілген пәтердің құнын қанша жылда қайтаруға болады

Қазақстанның әр қаласында жалға беріліп жатқан пәтерлердің орташа бағасын есепке алдық. Мысал ретінде ең көп сұралатын 35 шаршы метрлік бір бөлмелі пәтер таңдалды.

Қайда пәтер жалға берген тиімдірек

Krisha.kz сарапшыларының дерегіне сүйенсек, Қазақстанда орта есеппен 9 жыл 6 айда пәтер алуға жұмсалған шығынның орнын толтыруға мүмкіндік бар. Жалға алушы ай сайын беретін ақша дәл осы уақытта пәтер құнына жетеді екен.

Бұл жағынан ең тиімді қала — Көкшетау. Мұнда шығынның орнын толтыруға 8 жыл уақыт кетеді.

  • Екінші орында — Ақтөбе: 8 жыл және 7 ай;
  • Үшінші орында — Қостанай: 8 жыл және 9 ай.

Ең тиімсіз шаһар — Ақтау. Мұнда 11 жыл 9 ай күтуге тура келеді.

Процесс ұзаққа созылатын қалалар тізімінде мыналар да бар:

  • Ақтау — 11 жыл және 9 ай;
  • Шымкент — 11 жыл және 3 ай;
  • Алматы — 10 жыл және 7 ай.

Көкшетау, Ақтөбе және Қостанай — жалға берілетін пәтерге инвестиция құю үшін ең жақсы қалалар.
Тиімділігі анағұрлым төмен қалалар — Ақтау, Шымкент және Алматы.

Қала

Шығынның өтелу мерзімі (жыл)

Астана

9.3

Алматы

10.7

Ақтөбе

8.7

Ақтау

11.9

Атырау

9.6

Қарағанды

9.3

Көкшетау

8.0

Қостанай

8.9

Павлодар

9.7

Петропавл

10.1

Орал

9.0

Өскемен

9.5

Шымкент

11.3

 

Krisha.kz екі жыл бұрын, 2022 жылдың қарашасында осыған ұқсас есеп жасаған. Ол кезде Орал жұмсалған ақшаны әлдеқайда жылдам қайтару мүмкіндігі жоғары қала атанды. Ең аз мерзім де қазіргідей 8 жыл шамасында болған. Ал ең ұзақ мерзім Шымкентте тіркелді (13 жыл және 7 ай).

Ел бойынша орташа көрсеткіш 9 жыл 7 ай болған, ал қазір 9 жыл 6 ай шамасында.
Жалпы алғанда, соңғы екі жылда айтарлықтай өзгеріс болмағаны байқалады.

Пәтер жалға берген тиімді ме

Көп адам жылжымайтын мүлікке инвестиция салу пайдасыз іс деп санайды. Өйткені одан түсетін табыс жылына 10 %-дан аспайды, ал депозитте жатқан қаражатқа банк 15 % үстеме қосады.

Бірақ жыл сайын баспана құны көз ілеспес жылдамдықпен өсіп, жалға берушілер бағаны шарықтатып жатыр, оған теңгенің құнсыздануын қосыңыз. Мұны ескерсек, аталған инвестиция құралы әлі де өзекті болып қалатыны анық.

Пәтер жалға берудің қандай қаупі бар

Үй жалға бергенде ескерілуге тиіс бірнеше қауіп бар:

  • Жалға алушы табылмай, ұзақ уақыт тұралап қалуы.
  • Жөндеуге кететін шығын: жалға алушылар мүлікті бүлдіріп кетуі мүмкін.
  • Салық төлеу.
  • Жалға алушының төлем жасамауы: ол пәтер ақысын төлемей, көшіп кетуі мүмкін.

Krisha.kz материалдарын қолданғанда алғашқы абзацта міндетті түрде сілтеме болуы керек!