Бастапқы жарнасыз ипотеканы қандай шарттармен рәсімдеуге болатынын түсіндіреміз.

Неліктен бастапқы жарна маңызды

Ипотека рәсімдегенде бастапқы жарна міндетті түрде керек. Екінші деңгейлі банктерде ең төменгі мөлшерлеме — 15–30%, Отбасы банкте — тұрғын үй құнының 50%-ын беру қажет.

Бұл — пәтер бағасының сатып алушы өзі төлейтін бөлігі. Қалғанын банк қаржыландырады.

Банк үшін бұл — сенімді қарыз алушы көрсеткіші.

Жарна неғұрлым жоғары болса, шарттар соғұрлым тиімді: мақұлдау ықтималдығы артады, қолжетімді сома ұлғаяды және кей бағдарламада мөлшерлеме төмен болады.

Бастапқы жарнасыз ипотека рәсімдеуге бола ма

Болады. Негізгі шарт — бастапқы жарнаның орнын қосымша кепіл, яғни жылжымайтын мүлік басады.

Мұндай бағдарламалар екінші деңгейлі банктерде бар, бірақ Отбасы банкте жоқ.

Бастапқы жарнасыз қалай ипотека алуға болады

Схема мынадай.

Қарыз алушы банкке өтінім жібереді.
Бастапқы жарнаның орнына қосымша кепіл ұсынады.

Бұл кез келген тұрғын үй болуы мүмкін:

  • пәтер,
  • жер үй,
  • жатақханадағы бөлме.

Жарамайды:

  • саяжай,
  • қойма,
  • паркинг,
  • коммерциялық үй-жай.

Одан кейін банк бағалайды.

Ипотека сомасы қосымша кепілдің бағаланған құнына байланысты, әдетте бұл бағаның 70—90%-ын құрайды.

Мысалы, банк пәтерді 40 млн теңгеге бағаласа, қарыз алушы 28-36 млн теңге ипотека рәсімдей алады.

Мүлік қосымша кепіл болады, ал негізгі кепіл — ипотекаға алынатын тұрғын үй.

Нәтижесінде екі жылжымайтын мүлік те кепілде болады.

Кепіл иесі болу міндетті ме

Кепілдегі мүлік қарыз алушының өзіне де, үшінші тұлғаға да (туыс, дос) тиесілі болуы мүмкін.

Меншік иесі (қарыз алушы болмаса), өз мүлкін кепілге қоюға келісім береді және қосалқы қарыз алушыға айналады.

Негізгі қарыз алушымен жауапкершілігі бірдей.

Ипотека төленбесе, банк қарызды өтеу үшін:

  • сатып алынған пәтерді,
  • қосымша кепілді сата алады.

Банк ипотека толық өтелгеннен кейін ғана тұрғын үйді кепілден алады.

Бастапқы жарнасыз ипотека: сұр схемалар

Интернетте «бастапқы жарнасыз ипотека рәсімдеу» қызметтері жиі кездеседі.
Көбінесе бұл — заңсыз схема.

Схема қалай жұмыс істейді

Брокер бағалаушымен келісіп, мүліктің құнын әдейі жоғары көрсетеді.

Мысалы:

  • пәтердің өз бағасы — 40 млн тг;
  • бағалаудан кейін — 50 млн тг.

Қарыз алушы 40 млн теңгеге несие алады, яғни сатушыға 20% жарна төлегендей болады.

Қауіп:

  • ақша жоғалту қаупі жоғары (қызмет құны несие сомасының 10%-ына дейін жетуі мүмкін);
  • банк бағаланған соманы қабылдамауы ықтимал;
  • «қызмет» үшін төленген ақша қайтарылмайды;
  • банк схеманы анықтаса, қарыз алушыны «қара тізімге» қосып, бағалаушыны лицензиясынан айыруы мүмкін.

Қазір банктер бастапқы жарна бар-жоғын қосымша тексереді:

  • ақша банк шоты арқылы өтуі керек;
  • немесе банк қызметкерінің қатысуымен сатушыға беріледі;
  • не сатушы ақшаны алғанын ресми растауы қажет.

Krisha.kz материалын пайдаланғанда бірінші абзацта міндетті түрде сілтеме болуы керек!