Ипотека алғыңыз келеді, бірақ банк өтінішіңізді мақұлдай ма, жоқ па, білмейсіз бе? Мұны алдын ала тексеруге болады. Банкке бармас бұрын қандай талаптарды ескеру керегін және өзіңізде нені тексеру қажет екенін түсіндіреміз.

Несие тарихыңызды тексеріңіз

Алдымен несие тарихыңызды біліп алыңыз. Онда қазіргі және өтелген несиелер, сондай-ақ мерзімі өткен төлемдер туралы ақпарат жазылады.
Оны eGov немесе Бірінші кредиттік бюро арқылы онлайн тексеруге болады.

Қазіргі мерзімі өткен төлем немесе өтелмеген қарыз болса, алдымен соларды шешкен дұрыс. Тіпті бұрынғы мерзімі өткен төлемдердің өзі банктің шешіміне әсер етуі мүмкін.

Несие тарихыңыз мүлде болмаса, бұл да қарыз алушыны бағалауды қиындатуы мүмкін.

Несие жүктемесін есептеңіз

Банк болашақ ипотекалық төлемді ғана емес, қолданыстағы басқа міндеттемелерді ескереді.
Сондықтан ипотека рәсімдемес бұрын тұтынушылық несиелер мен бөліп төлеу бойынша қарыздарды жапқан жөн. Ай сайынғы төлем неғұрлым аз болса, ипотекаға бағытталатын табыс соғұрлым көп болады.
Барлық несие бойынша жалпы төлем банктің белгіленген несие жүктемесінен аспауы керек.

Ресми табысыңызды тексеріңіз

Жалақыңыздың бір бөлігін бейресми түрде алсаңыз, банк оны есепке алмауы мүмкін. Соның салдарынан қажет сома алу үшін ресми табысыңыз жеткіліксіз болып қалуы ықтимал.

БЖЗҚ-дағы зейнетақы аударымдарын тексеріңіз, олар нақты жалақыңызға сәйкес болуы керек.

Бірнеше жерде ресми жұмыс істейтін болсаңыз, банкке қосымша табыстарыңыз туралы ақпаратты беріңіз.

Ипотека рәсімдемей тұрып жұмысыңызды ауыстырмаңыз

Банктер соңғы жұмыс орнындағы еңбек өтіліне назар аударады. Әдетте кемінде алты ай жұмыс істеу талап етіледі, ал осы кезеңдегі зейнетақы аударымдары үздіксіз болуы керек.

Жақын арада ипотека алуды жоспарласаңыз, жұмысты күрт ауыстыру өтініштің мақұлдану мүмкіндігін төмендетуі мүмкін.

Бастапқы жарнаны тексеріңіз

Енді қолыңызда қанша ақша бар екенін және банктен қанша қаражат қарызға алу қажет екенін есептеңіз.

  • Коммерциялық банктен ипотека алуды жоспарласаңыз, тұрғын үй құнының кемінде 20%-ы керек болады.

Мысалы, пәтер 30 млн теңге тұрады, 20% бастапқы жарна үшін 6 млн теңге жинау қажет. 24 млн теңге несие аласыз.

Бастапқы жарна неғұрлым көп болса, несие сомасы мен ай сайынғы төлем соғұрлым аз болады.

  • Отбасы банк арқылы ипотека рәсімеуді жоспарласаңыз.

Мұнда талаптар өзгеше. Тұрғын үй қарызын алу үшін оның құнының 50%-ын тұрғын үй жинақ депозитінде жинап, бағалау көрсеткіші (БК) бойынша талаптарды орындау қажет.

Уақытты да ескерген маңызды. Бастапқы жарнаның бір бөлігі қазір тұрғын үй депозитінде емес, мысалы, кәдімгі шотта тұрса, барлық соманы депозитке салғаннан кейін БК бірден өспейді. БК уақыт өте келе жиналады.

Сондықтан Отбасы банкінен ипотека алуды жоспарласаңыз, қаражатты тұрғын үй депозитіне алдын ала салып, қажет БК жинауға уақыт бөлген дұрыс.

Бастапқы жарнадан бөлек, қарыз алушыға тағы бірқатар шығынды өтеуге тура келетінін ұмытпаңыз. Ипотекаға қанша ақша қажет екенін есептедік.

Болашақ төлемді есептеңіз

Банкке ай сайын тұрақты түрде қанша сома төлей алатыныңызды алдын ала анықтап алыңыз.

Ол үшін тұрғын үйді таңдап, ипотеканы әртүрлі мерзімге, мысалы, 10, 15 немесе 20 жылға есептеп көруге болады. Несие калькуляторы банктердің сайтында бар.

Банктердің талаптарын зерттеңіз

Алдын ала әртүрлі банктегі ипотека шарттарын салыстырыңыз:

  • пайыздық мөлшерлеме,
  • бастапқы жарна,
  • мерзім,
  • тұрғын үйге қойылатын талаптар.

Бұл қай ипотекалық бағдарлама мен банк сізге сәйкес келетінін түсінуге көмектеседі.

Банктің кепілге қойылатын жылжымайтын мүлікке қандай талаптар қоятынын міндетті түрде анықтаңыз: үйдің салынған жылы, үйдің түрі, жағдайы, құжаттары және басқа шектеулер.

Ипотекаға дайын екеніңізді қалай түсінуге болады

Өтініш бермес бұрын мына бес тармақты тексеріңіз:

  1. Бастапқы жарнаңыз бар.
  2. Несие тарихыңызда мәселе жоқ.
  3. Ресми табысыңыз жетеді.
  4. Қазіргі несие жүктемеңіз.
  5. Таңдаған тұрғын үйіңіз банктің талаптарына сәйкес келеді.

Осылардан кейін ғана ипотекаға өтініш берген дұрыс.

Пайдалы материалдар:

Ипотека немесе жалға алу: 2026 жылы қайсысы тиімді