Жылжымайтын мүлік мәмілесін рәсімдегенде 50 мың теңгеден астам қаражат үнемдеуге болады. Ол үшін нотариустың қызметінен бас тартып, келісімшартты ХҚКО арқылы рәсімдеу жеткілікті.

Алайда мұндай жағдайда құжаттарды өзіңіз тексеруіңіз керек. Мәміленің қалай жасалатынын, қанша тұратынын және қандай мәселелерге ерекше назар аудару керегін түсіндіреміз.

Нотариуссыз мәмілені қалай рәсімдеуге болады

Пәтер, үй, саяжай немесе басқа жылжымайтын мүлік сатып алу-сату келісімшарты үшін нотариустың куәландыруы міндетті емес.
ХҚКО-ға барып, мәмілені сол жерде рәсімдеуге болады.

Екі жолы бар:

  1. өзіңіз дайындаған сатып алу-сату келісімшартымен бару;
  2. ХҚКО қызметкерінен келісімшарт жасап беруін сұрау. Мұндай жағдайда 8500 теңге төлеу қажет.

ХҚКО-да мәміле қалай рәсімделеді

1. Келісімшарт жасаңыз.
Оны өзіңіз дайындай аласыз. Онда сатушы мен сатып алушы туралы ақпарат, жылжымайтын мүліктің сипаттамасы және мәміленің талаптары жазылуы керек.

Міндетті түрде мыналарды тексеріңіз:

  • аты-жөні, ЖСН және жеке куәлік деректері;
  • жылжымайтын мүліктің мекенжайы, ауданы және кадастрлық нөмірі;
  • объектінің құны — нақты соманы жазыңыз;
  • есеп айырысу тәртібі мен мерзімі;
  • тұрғын үйді босату және кілттерді беру күні;
  • сатып алушыға қалатын жиһаз бен техника.

Келісімшарттағы барлық дерек жылжымайтын мүлік құжаттарындағы мәліметпен сәйкес келуі керек.

Krisha.kz заңгерлері келісімшарт үлгісін дайындады. Оны толтырып, басып шығару жеткілікті.

Маңызды: алдын ала кепілақы берілген болса, оның сомасы мен қалған төлем мөлшерін де келісімшартқа қосыңыз.

2. ХҚКО-ға барыңыз.
Сатушы мен сатып алушы жылжымайтын мүлік орналасқан жердегі ХҚКО-ға өздері баруы керек.

ХҚКО қызметкері тараптардың қолтаңбасы мен деректерін тексеріп, құжаттармен салыстырады. Барлығы дұрыс болса, келісімшартты куәландырады.

Өзіңізбен бірге мыналарды алып баруыңыз қажет:

  • жылжымайтын мүлікке қатысты құжаттар (құқық белгілейтін құжат, техникалық паспорт, мемлекеттік акт — жер телімін немесе жері бар үйді сатып алғанда);
  • тараптардың жеке куәліктері.

Сатушы немесе сатып алушы некеде болса, жұбайының келісімі қажет болады. Оны нотариуста немесе eGov Mobile қосымшасы арқылы онлайн рәсімдеуге болады. Мемлекеттік баж — 1.5 АЕК (2026 жылы 6488 теңге).

3. Меншік құқығын тіркеңіз.

Тіркеуге келісімшартты ХҚКО қызметкері жібереді.
2026 жылы пәтерге меншік құқығын тіркеу үшін мемлекеттік баж шамамен 1300 теңге.

Нотариуссыз мәміле қанша тұрады

Келісімшартты өзіңіз дайындасаңыз, нотариуссыз мәміленің құны шамамен 1300 теңге болады.
Келісімшартты ХҚКО маманы жасаса, жалпы сома шамамен 10 000 теңге болады. Жұбайының келісімі қажет болса, шамамен 16 000 теңге.
Нотариуста келісімшартты куәландыру 2026 жылы 51 900 теңге (12 АЕК) тұрады. Бұған меншік құқығын тіркеу үшін шамамен 1300 теңге қосылады.
Осылайша кәдімгі мәміленің жалпы құны 53 100 теңгеден асады, ал жұбайының келісімі қажет болса, шамамен 60 000 теңге болады.